Version française | Vèrsyon rényoné

Nou lans in lapèl pou nout Pèp Rényoné

Anou, Rényonèz, Rényoné, nou lans in lapèl pou nout tout réfléshi ansanm épi oir kosa épi koman nou pé fér pou in méyér domin pou nout péyi.

Lo 11/03/2015

Twitter Facebook Google Plus Linkedin email

PDF

Dosi lo plan sosial : lé présé !

Si nou pran bien konsians, la sitiasion sosial nout péyi lé inkiétan : 1 zène pou 2 napoin travay, 116 000 moun i koné pa lir ( INSEE : 2011), la moitié la popilasion lé plis pov ke pov, nana plizanplis in gran diférans rant sat nana tro é sat napoin rien. Sa i fé in gran séparasion dan nout popilasion é souvandéfoi domoun i gingn pi siporté : la sitiasion i ésploz , i provok inn robélion dan bann gran vil konm sat Shodron an 1991 é sat, napwin tro lontan ankor, an 2012... Bann révolt-là i fé konprann anou lo gran malizé nout zénès ; in malizé nivo sosial épi osi dan nout lidantité, nout « kisanoulé » akoz inn sosiété pos-kolonial la pa ankor gingn répar tout bann soufrans li minm la provoké. Dayér koman kroir in sosiété konmsa i soré kapab géri tout bann boubou-là ? Koman fé pou fini èk se léritaz : in koté léspri kolonialis, l'ot koté léspri kolonizé ?

Si léklavaz la été aboli, sé pa lo ka pou lo rasism èk lésploitasion.

Lé pa vré : Lanényon lé pa in lil ousa pliziér pèp la done randévou pou viv ansanm dan larmoni. Dopi promié débi nout Listoir lé né dan la violans, limiliasion, la déportasion. La déport bann promié zabitan dopi Madagascar. Apré bann négriyé la rorganiz la déportasion an mas bann Zafrikin, la anshène azot pou fé zéklav sanm zot épi pou fé travay azot dann bitasion bann zéropéin instalé dan lil. Bann Zafrikin-là la pérd zot kalité domoun lib, la pérd zot péyi, zot kiltir ; zot lété sou la koup bann Blan rapas té là zis pou zot prop rishès. Pou zot, bann Noir lété pa plis in zoutiy, in « marshandiz » ; solon zot sa lété pa in « méshansté », lété pa nonpli in « rabèsman » ; sa lété « zis » in maniér rann « lékonomi kolonial » pli for pou anrishi la Frans. Konmsa osi la Frans i artonm parmi lo bann pli gran « nasion inpérialis » Lérop. Zordi la Frans soré pa sat èl i lé si èl navé poin tout son bann koloni-là.

La aboli la « trèt négriér » épi lésklavaz. La Frans la aboli an dé foi lésklavaz mésoman lo promié foi, an 1794, bann kolon Larényon la rofiz nèt mèt sa an pratik. Alors Napoléon la anprofité pou rétabli lésklavaz an 1802. Soman, firamézir lavé plizanplis robélion dann « lanpir kolonial fransé » ; sa la obliz bann zéklavazis aboli lésklavaz an 1848 mésoman, pou pa pérd tout zot rishès, zot la mèt an plas in ot sistèm : zot té i sava rod bonpé Zindiyn, Shinoi, Zafrikin dan zot péyi pou fé travay azot isi Larényon dann kondision té i rosanm bien sat lésklavaz ; souvandéfoi té i promèt azot in vi méyér pou gingn fé vnir azot ; souvandéfoi osi té i trap de fors. Té i apèl azot « zangazé ». Anpliskesa zot té i obliz osi bann zéklav afranshi artourn travay dann bitasion zot lansien mèt sinonsa té i anferm azot la zol.

Konm partou si la tér nout sosiété la évolié, mésoman tout lo bann zinzistis lo sistèm esklavazis é kolonial la mèt an plas i kontinié zot déga kisoi dan léspri tout domoun, kisoi dan lorganizasion minm nout sosiété zordi.

In fraktir sosyal épi kolonyal

Isi Larényon nout sosiété lé kasé an dé : In koté sat i batay toultan dann shomaz ; sat i ésèy viv èk in « ti-kontra » ; sat i rès touzour dann in pozision linfériorité dan zot travay ( sé lo ka osi in bonpé anparmi nout bann frér é sèr dan lo bann zil otour). L'ot koté nana sat i viv bien : la pa bézoin kass zot tèt pou oir domin ; sat i zoué in rol dominér dann sistèm-là kisoi nivo politik, ékonomik é kiltirèl ( inn dé troi Rényoné ék in gran kantité Zorèy*). Rant dé group-là nana in troizièm : in « klas moyinn » ousa nou trouv sirtou bann franksionér i viv minm maniér sat i domine. Léta fransé la done azot détroi ti pouvoir mésoman i ansérv de zot konm in lalibi pou fé kroir tout sat li fé lé bon po nou ; épi sé osi in bon tiktakaz pou anpèsh domoun robélé.

Dopi lanfans, dopi lékol i komans kass nout « kisanoulé ». Nana 2 zafér lotér se dézas-la : la mizér sosial èk la « diglosi » ( kan nana 2 lang dan in minm téritoir mésoman nana inn i kroi li lé pli for é i kraz l'ot).
In koté nana bann ti zanfan i anserv fransé konm lang matérnèl ; zot paran i viv dan in sitiasion bon ousinonsa asé bon. Bann marmay-là nora la shans bien débrouy azot dan lo sistèm skolér an plas.
L'ot koté nana bann ti zanfan rényoné i viv dann in sitiasion sosial é familial difisil, sé kréol rényoné zot lang matérnèl, in lang lékol la répiblik fransé i « bord » éksopré toultan ( i rabès minm). Sitiasion-là i provok souvandéfoi in gran lopozision rant lo bann marmay é lékol ; i ariv minm zot i rozèt an blok lékol-là.

Lidéolozi kolonialis i mèt toultan an l'èr la Frans ( é i rabès toulézot) lé pa san konsékans dan nout koko-d-tèt, nout « kisanoulé ». Akoz sa minm nou rozèt nout bann rasine i sort Lafrik, nout Listoir, nout lang rényoné épi i done anou lo santiman nou lé infériér ; nou la ont nou kalité Rényoné.

Sé touzour se minm lidéolozi kolonialis i fé partir an mas, dopi toultan, nout zénès rényonèz dan péyi éropéin ( légzanp bann rényoné déporté : Bann zanfan la Creuse, lo BUMIDOM, l'ANT, lo CNARM) épi i fé rant an poundiak travayér zorèy pou « ankad » anou, pou mont anou sat i fo nou fé antank fransé. Aimé Césaire la apèl sistèm-là : lo « Génocide par substitution ».

Akoz tousa nou lé konsidéré konm infériér osi dan ninportékèl travay nou fé dan nout péyi : pou bann zanploi kalifié in Zorèy na plis shans gingn in travay isi Larényon oliérk in Rényoné nana lo minm diplom ke li ( Rapor Aubry 1997 : « Les métropolitains ont plus souvent un emploi que les natifs dans les DOM ». Nana osi lo rapor INED 2012 i di : « A diplôme égal, un métropolitain semble avoir un avantage sur le marché du travail et accéder plus facilement qu'un natif à une profession de qualification élévée. » Lo zène Rényoné la parti fé zétid an Frans, kan li rovien dan son péyi, va trouv moin fasilman in travay i koréspon son bann kalifikasion k'in moun la zamé viv dann se minm péyi-là.

Anpliskesa nana désértin néo-kolon i pans Larényon i apartien azot é i oz anserv nout pozision sosial pou fé « ri la gèl » ! Konm par égzanp « Pardon », in mark linz, la ozé é la gingn fé kroir li sé in mark « péyi » ! Dosi lo bann ti-shirt Pardon i vann nou artrouv lo minm kozman rasis domoun « l'extrème droite » an Frans i fane dosi nou : lalkol, lo shomaz, la drog, la parès, lasistans. Tout bann zizman préfabriké-là i rod pou dévaloriz anou ankor plis, pou rabès nout Pèp Rényoné.

Zorèy : pou di « métropolitin ». dann nout lapèl-là nou vé pa domoun i pans nou konsidér bann zorèy konm lo diab mésoman i fo nou rokoné la plipar anparmi banna nana in takon privilèz akoz zot lé « zorèy », akoz zot i roprézant lo sinbol la sipériorité èk lo pouvoir ékonomik. Sa i fé ke zot i pé avoir dé maniér konport azot :
In konportman kolonialis : lé normal zot lé là an dominér dann in péyi zot i kroi lé azot.
In konportman ousa zot i rokoné zot lé privilézié é là, zot i ésèy pa fé lo « dominatér » èk nou Rényoné.

La késtion kèl « stati »

La késtion « Kèl stati pou Larényon » i konsern zis lo koté pratik pou mèt an plas lo dévlopman i fo pou nout péyi épi osi pou plis zistis sosial. Apré la départmantalizasion lo gouvernman fransé la anserv la ménas lindépandans konm in « lépouvantay » pou fé férm la boush tout domoun té i batay pou zot lidantité rényoné é lavé poin minm zopinion politik ke li. Dann zané 60-70 la politik lo kolonialis Michel Debré la mèt an plas la koz in bonpé déga pou nout lidantité rényoné. Ninportékèl moun té i rofiz lasimilasion la Frans té i pass pou in « Lindépandantis », té i ariv minm té i déport ali an Frans ( « L'ordonance Debré ». Sé konmsi lavé mèt nout Parol, nout Kiltir dériér baro la zol ! Nout sèl vré modèl té i doi èt sat la « Métropole ».

Pou nou « Départman Outremer » lé zis in stati anparmi pliziér, é si stati-là lé pa bon pou nou Rényoné, i fo trouv d'ot solision lé méyér pou nou , i koréspon pou tout sat nou la bézoin pou vréman. Lé pa posib kroir lavnir soré méyér pou Larényon si napoin in vré prozé politik ; in prozé politik i pran an kont la réalité lo péyi é ousa nout lil èk nout Pèp i prann la résponsabilité zér son prop zafér . La pa bézoin rod « départman » sinonsa « lindépandans » i fodré zis konprann kosa soré méyér pou règ tout lo bann prolinm sosial nana isi Larényon épi koman fé réspèk nout Lidantité. Si nou vé pou vréman nana in takon solision lé posib é sa minm si nout rès dan lo kad fransé. I fo nou rofiz banna i obliz anou kèl mo i fo shoizi pou avoir lo droi koz dosi sat nou vé fé.

L'ér l'a arivé pou nou fé !

Nou vé pi èt parèy domoun kolonialis fransé la sitèlman bat atér, la tèt i gingn pi lévé ; nou vé pi i trèt anou konm sitoyin infériér, dézièm dégré ; nou vé i konsidér anou konm nout bann zansèt la rofiz loprésion ( Elie, Furcy, Anchaing, Héva...) ; nou rovandik nout droi viv konm in zètr-imin i koné kosa lé bon pou li, nou rovandik nout Lidantité. La natir la pa fé anou infériér lé zot moun dosi la tér. Nout péyi té konstrui dopi promié débi dan in sistèm kolonial, èk bann rapor dominatér domoun lé rish dosi sat lé pov, dosi sat napoin lo « bon koulér » solon zot ( sé in rézon sosial mé pa biolozik) ; sé lésklavaz, langazism, lo kapitalism, lo shomaz in bonpé domoun la provok in santiman linfériorité dan la tèt nout pèp. I fo nou dékoloniz anou nou minm !

Dékoloniz anou nou minm i vé dir i fo nou pran nout déstin an min, i fo pi nou kit lé zot désid pou nou. Pou sa i fodré nou réfléshi dosi nou minm-minm ; i fodré nou konpran anou osi nou lé « kapab » akoz si nou kroi pa nou lé kapab nou gingn arpa konprann lé zot non pli é nou va touzour santir anou infériér ; nou konprann arpa tout zètrimin lé égal dosi la tér. Alors akoz pa nou ? Pou dékoloniz anou i fodré osi nou konpran nou lé pa zis bon pou konsom bann zafér i sort déor akoz nou pé , nou gingn dévlop nout péyi Larényon, nou gingn fé in takon zafér nou la bézwin pou viv ; nou gingn sirtou produi tout sat nou la bézwin pou manzé isi.

Non, nout plas lé pa anba in « léshèl sosial » mi razout i dovré pa avoir se zistwar « léshèl sosial » akoz TOUT DOMOUN i dovré èt égal dosi la Tér, tout domoun i dovré gingn viv konm i fo : dan la dinité. L'ér la arivé pou nou kass tout bann shène kisoi sosial, kisoi bann shinn nout Léspri, nout Domounité , pou nou trouv anfin nout plas dann tout dominn nout Péyi.

Pou gingn fé sa i fodré pou vréman nout bat atér tout lo bann « konplèx linfériorité » i blok nout Léspri ; i fodré nou mazine in vré shanzman pou TOUT domoun ; pa in shanzman zis pou mèt détroi an l'ér. I fo nou mazine mésoman i fo nou FÉ osi.

Tout sat nou la ékri là sé in Lapèl ; in lapèl pou nou rorganiz anou par nou minm, pou nou minm. Nana in bonpé maniér pou nou rorganiz anou : « ansanm-ansanm » pou la viktoir lo bann zobzéktif nou la maziné é nou pans lé méyér pou nou ; « ansanm-ansanm » pou fé antann nout paroli ; pouk i rokoné nout kapasité dann tout désizion ; pouk i rokoné i gingn arpi fé san konté dosi nout valér ; anfin « ansanm-ansanm » pou fér « La Politique » mésoman san konsidér fér la politik konm in travay i raport in bonpé é ousa i tarz domoun konm si sé zis zot biltin-d-vot i kont. Nou vé pi bès nout tèt !

L'ér la arivé pou nou réfléshi épi mèt ansanm tout sat nou pans !


Nou lé pa plis, nou lé pa mwin,


Réyoné lèv la tèt !

« C’est ici une véritable révolution copernicienne qu’il faut imposer, tant est enracinée en Europe, et dans tous les partis, et dans tous les domaines, de l’extrême droite à l’extrême gauche, l’habitude de faire pour nous, l’habitude de disposer pour nous, l’habitude de penser pour nous, bref l’habitude de nous contester ce droit à l’initiative [...] qui est, en définitive, le droit à la personnalité. »

Aimé Césaire, Lettre à Maurice Thorez

Signataires


Sébastien C. (Ti Kréol Kont Gro Profitèr), Cyril Boyer, Teddy Aky, Alexia Aky, Nathan Aky, Xavier F., Zavyé Rivière, Boyer Maximin (KAYANMBE TOUR), Eric Krishna, Kalou Badia, Laëtitia Velleyen, Cécile Dugain, Matyé Lorèt, Thierry Ilamoucha, Gaël Velleyen (KRÉOLOKOZ), Mark Saint-Omer, Christophe Vienne, Kristo Techer, Noeline Ferard (KILTIR FO ALÉ), Willy JP Techer dit Babou B'Jalah (Poète, Plasticien, Journaliste), Judicael Michaud, Monique Dijoux Turpin, Fabien Grimaud (Étudiant), Thierry Chassagne, Madeleine Bègue, Mariline Dijoux, Fabio Marouvin, Ghislaine BESSIÈRE, Jacky "Jax" Coridon, Alex Sorres (artist’ la Rényon), Jeedey Asko (KréVkèr), Daoud974 (artiste la réunion), Nicolas Sery, Frédéric Rivière, CRAN REUNION, Johan B., Brice Dorla (employé RATP), Éric Vienne, Fabrice Lebon (LEBON Z'IMAGES), Alexandra Noël (Étudiante en Sociologie), Véronique Martin, Kafyab Lo Maronèr, Nicolas Rousse, Jennifer Porlon, Ognard (St-Pierre), Joel Moutoulatchimy, Israël Abemonty, Julien A. (citoyen Réunionnais), Guylène Champigneul, Gilles Ecormier, Paul Tibère, Alèk, Louis Lai Kane Chéong, Matié Tavernier (ZOLIZIMAZ), David Bulin, Leila Payet (jeune créatrice Réunionnaise indépendante), Martine Adama, Marie-pierre Paris (Plasticienne), Marie-therese Paulee, David Poudroux, Clément Rivière (Animateur jeunes, artiste la réunion), Marie-Ange Gourouaya (conseillère à la MLE), Sandrine Egline Morva, Didyé Maronaz, Anneline Payet, Jean Thierry Pontiac (Sitwayin la rényion), David Lebihan, Éri'k Ronn, Giovanna Grondin, Nicolas Mansard, OZE (Rapèr, Rimayèr Larényon , militan pou la lang rényoné partou), Kataline Minamba, Annabelle Desiles, Joelle Atancary-Padavatan, Sharl Sintomèr (prezidan du MLK - MOUVMAN LANTANT KOUDMIN), Faïza Mounir, Laurent Dennemont, Stéphane Marcy, Dominique Carrère, Marie Ange Bluker, Sylvienne Sumac, Florida Cadet, Paelle Gigan (artiste), Tony Léar, Maryse Bergier, Alexandre Pattiama, Yolaine Boutillon, Vincent Zywot, Cécile Marvillier, Jérôme Cadet (FRANCBÂTARDS), JS Ayagapin (agent social), Marie Emmanuelle Sautron, Davy G., Frédérik Mayo (prézidan RSKP), Jean-Laurent Faubourg, Aurélie Anoupe, Stéphane Grondin (militant culturel - maloya), Willy Ramboatinarisoa, Jérôme Calciné (Musicien), Adras Raoul (Dadawa), Dominique Rivière, Sista Angel, Émilie Delela (Étudiante)


Partagez !

Twitter Facebook Google Plus Linkedin email